【好師傅專欄】黃師傅│裝修點會冇瑕疵？但起碼要過到自己先

黃師傅│裝修點會冇瑕疵？但起碼要過到自己先

落筆前，先自爆瘀事。

記得筆者當日約黃師傅做訪問，抵達單位時，只見一名赤膊裝修師傅在趕工，故未敢打擾，還以為師傅姍姍來遲。半小時後，終忍不住致電師傅。結果如何？你猜對了，接聽人正是赤膊師傅。

「我以為你係送貨……」黃師傅直說。

「我以為你係師傅啲0靚……」筆者更直。

產生誤會也不能太怪筆者。面前黃師傅長相後生，頂多三十出頭，誰想到他早已縱橫裝修界多年？天生童顏人人羨慕，卻成為他的煩惱。

「幾年前出去見客真係麻煩啲，成日覺得我後生，問我做咗幾耐。當然我唔會話做咗廿年啦！」

裝修界的「四哥」
 

黃師傅花名「四哥」，由來挺特別。當年16歲入行，老一輩師傅只叫他「四眼仔」，後來到自己出來做泥水判頭，再聘請這班老師傅時，老師傅當然不敢叫他做「四眼仔」，便統統改口叫「四哥」，性格隨和又爽快的黃師傅便照單全收。

年輕的外表，卻埋藏着許多辛酸與歷煉。黃師傅最初做學師時先做水電，後來轉做收入較豐的泥水。03年沙士時期，他剛升到中工，卻因高不成、低不就而沒有工開，無端端跑去迪士尼做燒焊。

「嗰時識人喺迪士尼做燒焊，係呀九唔搭八，但都要開飯呀。」

做了一年多迪士尼，黃師傅決心做回本行，其時因未夠資格升師傅，見工頻頻碰壁，惟有「中工扮師傅」，才勉強有人收留。

「嗰時好慘，要扮師傅攞經驗。當時未夠料，自然畀人炒，再扮師傅再畀人炒。浸咗一年，終於可以堂堂正正同人講自己係師傅。」

黃師傅的人生出現過好幾次轉捩點，其中一次竟然是他學人做傳銷。錢是賠了，卻讓他認識到不同階層的人，會計師、醫生、核數師、生意人都有，視野擴闊了許多。

「思維唔同咗，令後面個人生完全唔同晒。好似我哋咁嘅出身，唔會諗點樣開公司，點樣搞網頁，點樣去吸客。」

單憑一個「勇」字去拚
 

因緣際遇下，黃師傅決心創業， 30歲未到便做老闆，亦即由「四眼仔」蛻變成「四哥」的時候。幸運地，公司很快便上軌道，那時寫字樓、職樓、酒樓統統接來做，後來又接連做了幾單大工程，如私人會所德藝會、博藝會等，又試過裝修面積2萬多呎、3層高的老人院，都是單憑一個「勇」字去拚。

「有冇諗後果？冇啦，諗咩啊！我性格係咁，覺得機會嚟啦嘛飛雲。」

如果處理得好  係唔應該會咁樣
 

一切看似一帆風順，事實上黃師傅是從失敗中跌跌碰碰的撐過來。如有一次，他接了一單酒樓工程，見進度已七七八八便去歐洲渡蜜月。誰知他一到埗，酒樓突然跳掣，那年頭WhatsApp還未普及，他未能及時聯絡上電工師傅補鑊。

「我返到香港變晒天，嗰次砸咗70幾萬尾數，前後搞咗起碼一年。其實如果處理得好，係唔應該會咁樣。」

啲人覺得我前世未做過嘢
 

這些年來，黃師傅主理過無數豪宅單位，但說到最引以為傲的代表作，卻是一間非常普通的村屋，因為是他一手一腳砌。

「由泥水、鬥木、油漆、清場自己一個人做曬，我又真係樣樣都識。我又癲嘅，9點返，11點收，日日如是，做咗兩個零月。啲人覺得我前世未做過嘢咁！」

其實裝修點會冇瑕疵？但起碼要過到自己先
 

也許是「瀨嘢」太多，又或是天生勞碌命，黃師傅選擇花多些時間在埋尾，裝盞燈也好，換口螺絲都好，都不會假手於人。

「同埋我好鍾意做清潔，我會抹哂所有嘢，邊度有瑕疵，我一眼睇晒。其實裝修點會冇瑕疵？一定有嘅，但起碼要過到自己先，之後先畀人囉。」

見我裝修咁細心  其實因為我瀨過嘢啫
 

黃師傅坦言自己不夠細心，今天能在裝修領域上做到一絲不苟，賺到聲譽且回頭客眾多，全是經驗累積回來，「今日你見我裝修咁細心，其實因為我瀨過嘢啫！」

做嘢要畀番個尊重人哋
 

訪問尾聲，黃師傅突然拿出一套「飲衫」，並以極速換裝，原來他準備見客。

「做嘢要有做嘢個樣，畀番個尊重人哋，所以我唔會恤衫牛仔褲咁行出去。」

筆者心想，若然黃師傅一開始便這個look，就不會產生誤會啦。